Santiago, 22 de xullo de 2009.- O conselleiro de Economía e Industria da Xunta de Galicia, Javier Guerra Fernández, trasladou hoxe á Federación Galega de Xóvenes Empresarios (Fegaxe), encabezada polo seu presidente, Daniel Ramos Lobón, a súa “total disposición a apoiar todos aqueles proxectos novedosos que axuden a crear e fortalecer o tecido empresarial innovador en Galicia”. Guerra Fernández asumiu este compromiso no transcurso dun encontro no que os novos empresarios amosaron tamén “dispoñibilidade absoluta” para colaborar co actual Goberno da Xunta de Galicia.
O responsable do departamento de Economía e Industria explicou ante os representantes da Federación todas as medidas que se están a artellar dende a Consellería para promover a inversión, facilitar a financiación e dotar de avais ás empresas do tecido produtivo galego. Guerra Fernández destacou a recente presentación do Plan re-imaXina, que habilitará préstamos subsidiados e avalados por un importe de ata 15 millóns de euros para apoiar o financiamento dos investimentos impulsados por novas pemes, para pemes que queren medrar ou renovarse para mellorar en competitividade e para microempresas galegas.
Guerra Fernández enmarcou esta nova etapa de entendemento cos novos empresarios galegos nun clima de “colaboración” e reciprocidade no que a Consellería de Economía e Industria ten o obxectivo de facilitar unha rápida e áxil resposta ás necesidades dos emprendedores. O conselleiro fixou os compromisos do seu departamento para acadar unha maior transparencia nas axudas repartidas e na comunicación das mesmas, pero tamén apelou á seriedade e responsabilidade dos empresarios á hora de presentar plans de negocio e manter os postos de traballo.
O conselleiro de Economía e Industria non deixou pasar a oportunidade de animar aos emprendedores a presentar proxectos susceptibles de recibir axudas de investimento real, porque existen importantes partidas orzamentarias destinadas ás pemes e á práctica totalidade dos sectores produtivos para apoiar ideas de negocio a medio e longo prazo. Estes investimentos han de ser tamén compatibles cos destinados a solucionar problemas a curto e inmediato prazo.
Os novos empresarios representados na Federación amosaron o seu interese nos proxectos da Consellería de Economía e Industria e do novo Goberno da Xunta para traballar a prol da internacionalización das empresas galegas. Guerra Fernández trasladou á Fegaxe que o seu departamento aúna agora mesmo todos os elementos necesarios para potenciar a saída dos emprendedores de Galicia aos mercados exteriores, en contraposición á dispersión destes elementos de axuda que existía na anterior lexislatura. Do mesmo xeito, apuntou que tamén é necesario atraer inversións de fóra a Galicia para fortalecer o tecido produtivo autonómico.
